مسائكم جمال , وكل عام والجميلات بخير
بوست جديد وسريع ممكن ما أكون قلت فيه شي جديد بس الاغلبية ليلة العيد مو عارفة وش تسوي بالضبط عشان تهيئ بشرتها
او بالاحرى مو عارفة من وين تبدأ هالبوست بساعدك ترتبين افكارك
قبل ليلة العيد + ليلة العيد
طبعا انا ما أؤيد اعتمد على المشاغل لان أبمكاننا نعرف اصول الشغلة ونطبقها وممكن احسن منهم بعد
المرحلة الاولى : إزالة شعر الوجه
طبعا هالمرحلة مهمه اعتبرها لأن الوجه أصفى مع الميك اب وكذا ,
بس اذا كان الشعر خفيف فأنصح انك تكتفين بأزاله الشنب بس وباقي الشعر شقريه أو اتركيه ع حاله
طبعا يا تشقير او شمع
اما بالنسبة لشرايح فيت فتجربتي معها سيئة جدا استخدمتها العام وسببت لي مشكلة ببشرتي مشاكل مبدئية وعلى المدى البعيد
مع اني جبت للبشرة الحساسة , الغراء ما راح بسرعه من وجهي وصرت احكه بالمنديل تبعهم وحمر وجهي وفيه بقايا غرا عالقة
وبعدين الشعر كثر بوجهي وضح وهو كان خفيييف مرة
بعدها قلبت بشرتي حساسة و تغيرت جدا يعني حبوب وحساسية , جلست فترة علاج نص سنة تقريبا
ممكن ناسبت غيري بس انتي اعتمدي قبل العيد لشيل شعر الوجه شي انتي مجربته من قبل ومناسبك وماسبب لك اي مشكلة
ممكن تستخدمين مشقر اذا والله وجهك شعره خفيف و خايفه من نتائج شيل الشعر
عندك مشقر جولان
مشقر بوتس
كلها حلوة وتؤدي الغرض
بس شي مهم في تشقير الوجه :
المدة ترا ان طولت تحرق يعني حاولي ماتتركينه على وجهك أكثر من عشر دقائق
وبعده استخدمي كريم أبو اسد أو فازلين أو اي كريم حق حساسية ومناسبك يعني
الشمع :
طبعا اغلب البنات مايتهورون فيه لكامل الوجه وانا وحدة منهم
تشوف ان الشغلة صعبة ممكن تسبب لها مشاكل وتروح المشغل دايركت
طريقتي في إزالة شعر الشنب :
أجيب حلاوة عادية واحطها بموية حارة الى أن تذوب وتصير سايلة
بعدين أكون عند المراية ومعاي ماسك هذا الماسك بحطه على وجهي فورا بعد ما انتهي عبارة عن :
نشا وموية ورد
تفردين على منطقة الشنب وهي بتصير سايلة جدا تتركينها شوي بعدين تشيلين وحاولي تتمين الشغلة مرة وحدة يعني ماتعيدين وتزيدين
عشان ماتتهيج بشرتك
و انا صراحة ما انصح اللي يدها مو خفيفة تشيل بنفسها لن ممكن تطول ويتهيج وجهها فأفضل حل للي متمرسة بالشغلة
بعدين علطول تحطين الماسك
-
بعد شلت شعر وجهي أو شقرته ألحين أنتقل لشعر الحواجب طبعا تشقير وكلنا نعرف حكم النتف أو النمص: حرام وملعونة بالشرع
وحرام يعني اأنني أنطرد من رحمة ربي بسبب شعرات ابي أتجمل فيها وعندي طرق متوفرة ومباحة !
التشقير بمشقر بوتس أو بلوندر وأكسجين ويلا المتعارف عليه
طريقتي بالتشقير هنا : - عشان الكلام طويل شوي فأبحطه برابط لو حابه تقرين -
وهنا شوية فلسفة عن التشقير :d
الحين وبعد ما شقرت حواجبي أعطي وجهي مهلة يوم راحة من بكرة بالمراحل الثانية
بعد ماتعطين وجهك راحة وبكرة العيد ضروري تقابلين الناس بفيس مشعّ ونضر ونظيف ويلقلق يعني
كلها خطوات بسيطة تاخذ من وقتك الجميل ساعتين بالكثير
اول مرحلة : تنظيف البشرة
بتستخدمين هنا غسولك المناسب أو صابونتك اللي متعودة عليها يا كركم يا بيزلين يا أي منتج لهالغرض
تغسلين وجهك ويفضل تستخدمين فرشاة بودي شوب للوجه بحركات دائرية ثم تشطفينه وتجففين بمنشفه
هنا ممكن تستخدمين الاسكينول لرقبتك
ألحين نبغى نفتح مسام الوجه استعدادا للمرحلة الثانية المقشر ولصقات الانف
تستخدمين آلة البخار أو تجيبين حافظة صغيرة في موية مغلية وتحطين فيها قطع نعناع عشان الانتعاش الجميل أو اي شي تحبينه
ومعك فوطه حطي راسك لمدة عشر دقايق تعرضين وجهك للبخار
بعد ماتخلصين بتحسين وجهك مساماته تفتحت وصار أحمر شوي بفعل البخار
أحط لصقة الانف و انتقل للمرحلة الثانية
المرحلة الثانية :
بعد مانظفت بشرتي وفتحت مساماتها أبي أقشر وجهي , عشان لايتقشر وقت الميك آب ويخرب شكلي
أفضل أفضل مقشر مثالي لك قبل ماتحطين ميك أب وبتحسين معه بإحساس جميل وملمس خرافي ؟
السكر البني - العسل - زيت الزيتون
بلا مركبات كيميائية بلا هم
تحطين من كل شي ملعقة أو المقدار اللي تحبينه , طبعا السكر البني اذا بشرتك تتحسس وكذا او عادي يعني شي راجع لك
تفردينه على بشرتك ورقبتك وجسمك كامل اذا تبين تحسين ببشرة بيبي بالعيد
بعدين تبدين تقشير بفرشاة بودي شوب للوجه او بيدك : بحركات دائرية لمدة خمس دقايق بعدين تتركينه عالوجه عشر دقايق زيادة
بعد كذا أشطفه بموية باردة ع اساس تتسكر مساماتي الحين وحاولي تتدرجين بالبرودة هاتي معك كاس من البرادة خليه آخر شطفه لوجهك
بخي شوي موية ورد
بعدين نشفيه ولاتغسلين وجهك بأي صابون خلاص احنا نظفناه تنظيف عميق ورطبنا وسكرنا مسامه خلاص !
طبعا تكونين شلتي لصقات الانف اللي فوق قبل ماتغسلين المقشر
اذا ودك بزيادة ترطيب استخدمي كريمك المرطب سيتافيل أو اي كريم تتعاملين معاه
الحين وجهك جاهز للميك أب أنطلقي
ليش انا ركزت على مقشر طبيعي هاليوم وهاذا المقشر بالذات ؟
لانه ممتاز اذا بتحطين بعده ميك اب مباشرة بتحسين ان الفاونديشن يتوزع معك براحة لان وجهك ناعم مترطب من جوى ترطيب طبيعي صح
ومافي أمل تطلع لك القشور !
طبعا فاونديشنك اللي متعودة عليه ضروري يكون ملائم لنوع بشرتك ماتحطين أساس ينشف على الوجه تركيبته مات ووجهك جاف !
والعكس
ماتستخدمين فاونديشن سايل وزيتي شوي ووجهك دهني !
وبس اي سؤال هنا
