سلام عليكم
مع الاجواء الجميلة النفسيات ممتازة ولله الحمد والكل قاعد ببيته عشان البرد وبما اني صايرة أؤجل ودايم تشوفوني احط اشياء ومنتجات وخلطات بانستقرام بشكل سريع وتجون تسالوني عنها آسك واحيان اجاوب على نفس السؤال كم مرة وكل وحده اعطيها
رابط جوابي للي قبلها وأشتتكم !
ف الافضل اني أنزل بوست مفصل ويصير مرجع للاشياء اللي دايم أتكلم عنها تجاربي عنها بالتفصيل ورايي فيها
أولها الخلطة الصابونية أو خلطة الكركم
دايم دااايم داييم اتكلم عنها واللي يتابعوني بانستقرام يعرفون قد ايش أقدس هالخلطة وأحبها كثير وكل فترة أصلحها
الفكرة الاساسية فيها :
العودة للطبيعه , يعني مليتي من الشاورز جل ؟ ماودك بروايح مزعجة وتسبب لك اسمرار وجفاف بجلدك ؟
ودك باشياء طبيعيه وتفتح الجسم وتنظف من قلب وترطب فنفس الوقت ؟
تلجأين للخلطة الصابونية
فوايدها :
المكونات :
طبعا انا انصحك تاخذين كل اغراضها من العطارين أفضل وأضمن من المحلات العادية والهايبر ماركت وحتى الصيدليات
اضمن شي العطارين وعطارة بن منقاش بالذات لأن اغراضهم معروف طبيعيه 100 %
فروع العطار : http://binmenqash.net/branchs.php#_=_
صابونة غار
بودرة الكركم للجسم
ماء ورد
علبة جليسوليد
علبة فازلين
علبة فكس صغيرة
زيت الجلسرين السائل
زيت الخروع
زيت اللوز المر
زيت الزيتون
طريقة التحضير :
بعد ماتبشرين الصابون صابون الغار , طبعا انا هنا ضايفة معها صابونة كركم ونشا
تبشرينه ناعم في طشت وتصبين عليه علبة موية ورد وتنقع يوم كامل وتنامين خلاص انسيها
من بكرة بنبدأ بالتحضير المرحلة الثانية
اليوم الثاني :
تجيبين خلاط كهربائي عادي وتحطين صوابينك اللي نقعتيهم أمس بموية الورد وتجيبين باقي المكونات وتحطينهم عادي
طبعا المقادير لشخص واحد مكتوبه فوق بالورقة اذا تبين زيادة رح تزيدين من كل شي مقدار ثاني
بعد ماتخلطينهم خلاص تعلبينها ويصير شكلها كذا
طبعا انا هنا سويت كميات كبيرة لاني وزعتهم على أخواتي الجميلات وكلهم جربوها معي
المهم فالموضوع انها تحفظ بحرارة الغرفة مو ضروي تنحط بالثلاجة
الحين نجي لطريقة الاستخدام :
المدة المفروضة : بشكل يومي لمدة لاتقل شهر
تحطينها يوميا قبل الشاور بساعه تدخلين الحمام تحطينها ع جسمك وهو جااف ثم تتركينها شوي الى ان تنشف او تخصصين لها لبس معين بس لاتشيلين همها تنشف عالجسم بسرعه ، تطلعين وتسوين اشغالك. بالبيت من ساعه لنص اقل شي بعد مذا وقت الشور تستخدمين ضروري ليفة مغربية او قفاز عندك من بودي شوب او سوب اندغلوري اهم شي ليفه للفرك تبللينها وتحطين معها ملح الحليب او ليمونة معصورة ع الليفة عشان تحصلين على تقشير بنفس الوقت ، ثم ابدي بالفرك من عشر دقايق الى ربع ساعه حسب روقانك ، واغسلي ، وتمتعي بالملمس الناعم والصفااااوة
شي مهم فالليف اللي نستخدمه او القفاز :
وبما أن الخلطة رح استخدمها بشكل يومي ضروري تكون ليفتي مهيئة كل يوم لاني لو مانظفتها بتجمع فيها البكتيريا وبتسبب لي حبوب
وبدال ما انا ابي منفعه القى مضرة
فكيف رح انظفها ؟
ليفة الجسم او القفاز او اي شي تستخدمونه مع الشاور جل عشان يعيش لك ❤ يبغى تهوية وتعقيم ،
بعد الاستخدام تغسلينها بصابون لطيف وغير معطر عشان مايتحسس جسمك ثم تنقعينها ب طشت موية حااااارة مع ديتول و ملح خشن
زيادة تعقييييييم 😍 ثم تنشرينها بمكان فيها هواء ويفضل تعرضينها للشمس بين فترة والثانية
رأيي الصريح المتعصب في الخلطة الصابونية :
بقولكم انا مرح ادافع عنها لاني تعبت وحطيتها وسويتها والا بس لاني جربت بتكلم فتجربتي بمدح و بمدح فاشيائي و بس !!
لولا جمالها ماكررتها ابدا لأنها زي ماتشوفون شوي متعبة واغراضها كثير بس حابة اصحح شوية معلومات حول بعض الاسئلة اللي جتني طول الفترة الماضية :
اول شي مو كلها مواد ترطيب فقط عندك مواد تفتيح واهمها صابونة الغار المكون الرئيسي فالخلطة ومعروفة الصابونة بالتفتيح والتنظيف وبودرة الكركم بحد ذاتها مفتح فظيع والدليل انك ممكن تحطينها مع موية ورد لحالها
فكيف اذا ضفتها مع خلطة صابون ؟
موية الورد بتشد البشرة وبتصفيها برضو عندك الزيوت اللي تفتح مثل زيت اللوز المر ممتاز للتفتيح عني استخدمه كمرطب على وجهي لحاله عشان التفتيح وللمناطق الخاصة ،
اللي مخصصين للترطيب لحاله بدون تفتيح عندنا زيت الزيتون والخروع
ومعروف من الازل ان الجلسرين والفازلين والجليسوليد مواد مفتحة للبشرة
والفقس اضيف فالخلطة فقط بقصد الاحساس بالانتعاش ، وبامكانك تستغنين عنه اذا كارهته ،
طيب لو افترضنا أن المكونات هذي وكل المقادير للترطيب فقط ف هذا شي بيفتح لي بشرتي مع الوقت ،كيف ؟
لان العكس الجفاف واهمال الترطيب سبب رئيسي لشيخوخة البشرة والاسمرار ، لو ارطب وبس مع الوقت بيحصلي تفتيح لان الترطيب المركز اصلا شي بيفيدني ويقودني الى التفتيح ، غير كذا انا استخدمتها وشفت نتايج تنظيف وتفتيح وترطيب عميييقة للبشرة
كم مرة استخدمتها وهل شفت نتيجة فعلا ؟
3 مرات
المرة الاولى بشكل متقطع
المرة الثانية كانت في نهاية شعبان وبداية شهر رمضان 1434 بشكل يومي بعد ما افطر احطها اجي اتعشى واجلس فيها الى بعد صلاة العشاء تقريبا نص ساعه بس ما اكون جالسة عشان ماتلصق بملابسي أكون أروح واجي واتمشى بالبيت اسوي اشغالي اي شي
المرة الثالثة هذا الشهر بداية السنة هذي 1435 وللأمانة خلصت نص العلبة جلست اسبوعين غير منتظمة يوم ورى يوم
تركتها شوي رجعت يومين ورا بعض يعني هالنص الباقي مو راضي يخلص وخصوصا مع هالشتاء مايصير لك خلق ()
علطول برجع استخدمها ليه ؟
لان نتايجها حلوة عجبتني وتجنن
تبييض نعومة ويكفي انها كلها اشيا طبيعية فوايدها مضمونة باذن الله ، اذا استخدمتها أحس اني اناظر الشاور جل اللي استخدمهم أول نظرة دونية هههه يعني استحقرها والله لأني ماتسوي لنا شي ابد بالعكس الاسمرار والجفاف اللي تكون بأجسامنا كانت هي السبب الرئيسي فيها
قوام الخلطة خفيف وتنشف عالبشرة يعني مرح اشيل هم تبقى عالملابس يعني بامكاني احطها لمدة ساعة قبل الشاور واطلع اكمل شغلي بالبيت وعلى فكرة هي تشابه الصابون المغربي كثير ف بنستخدم معها ليفة الصابون المغربي ، او قفاز بودي شوب او سوب اند غلوري
تقريبا قبل اي عيد اجلس اسبوع قبل استخدمها تحسين ان يديك وصدرك رجولك تلقّ تصفي الجسم وتنعم اضعاف اضعاف اذا كنتي تستخدمين معها ملح الحليب بتصيرين تقشرين كل يوم , اللي لاحظته بعد الحبوب اللي بالفخذ اختفت معاد فيه مكان مقشر بشرتي بشرة بيبي يعني كثيييير نتايجها بتلاحظينها بنفسك مع الاستمرار واكيد كل خلطة او صابون للجسم مع الاستمرار بنلاحظ معها الفرق اكيد
مستحيل بتحكمين من أول او ثاني استخدام بس زي ماقلتلكم هذي الخلطة فوايدها مضمونة من ناحية التفتيح والترطيب
وبس انا خلصت .
تابعوني بانستقرام rmrmaziz@
و اسئلوني بالاسك http://ask.fm/adDax
هل هي تبيض او مجرد تفتيح
ردحذف