أهلا أهلا بالجميلات , بوست جديد لمفضلات جديدة ,
طبعا مو كل شهر بنزل مفضلات لأن اي منتج لازم ماتحكم عليه الا بعد تجربة لاتقل عن الشهر
المهم انا مرة مبسوطة وأنبسط اذا بنزل شي وفيه أحد بيستفيد وبيتفاعل معي سواء بالبلوق بالاسك بمنتدى بإقلاع
أو حتى بتويتر وأنستقرام
وان شاءالله اني هالمرة بكون كثيييرة هنا تعرفون رمضان الله يشرفه مقبل والعيد ويبغالنا عناية وخلطات وهذا $
المهم ارجع للبوست $
صورة جماعية لمفضلاتي لهذا الشهر
من ميك أب لعناية بالوجه والجسم والشعر وعطور ومنكير
بسم الله
أول شي بتكلم عليه الميك أب :
أرواج ريفلون ليب بيتر أو ارواج زبدة الشيا
سبق وحكيت عنها وموجودة بمفضلاتي اللي قبل والى الان في الصداارة
الشي المهم بالموضوع انها يوميه صباحية ألوانها كلها ناتشورال وطبيعيه بس مافيها هذاك ثبات طبعاً لان تركيبتها زبدة
ومركزة على الترطيب والمعالجة أكثر من مجرد تلوين الشفاه
هالدرجتين أكثر شي أستخدمهم لهالصيف :
اليمين لونه أورانج على أحمر والدرجة اصلا بشكل عام زي ماقلت خفيفة ماهي أوفر أبداا
جدا بيرفكت مع التان والصيف
الدرجة الثانية يسار, يعطي طلة مريحة جدا
اللي بعده هالمنتج الشهير من بنفت :
المنتج مثل ما الاغلبية يعرف : بلشر وروج بنفس الوقت وينفع كـ بيس للروج يثبت الروج
أو تحطينه لحاله الطلة طبيعية وناتشورال 100%
ليه الدرجة الاورانج هذي بالذات ؟
أشوفها أحلى بكثير من اللي جاية على أحمر مادري ماعجبتني شكلها عالشفايف كأنك شاربة فيمتو $
وبرضو بشرتي حنطية وتناسبني الدرجات الاورانج الخفيفة بالميك أب مثل هالمنتج
سواتش للأرواج بالترتيب :
اللي بعده ماسكارا GROW LUSCIOUS
قرو لاشز من ريفلون
الماسكارا هذي جدا جدا يوميه وجميييييلة
خفيفه عالعين ماتحسين بثقل عالعين - تروح بسرعة - ماتلطخ - سوادها جميل - وتعطي تكثيف وتطويل بشكل طبيعي
أخذتها من مدح قناة
وحمدلله طلعت قد المدح
اللي بعده
Poudre Brillante من ميك أب فورإيفر
بودرة لامعة للوجه والجسم
فيها درجات كثيرة بس اخترت درجة البرونز لانها قريبة من بشرتي وتنفع للوك البرونز والتان
الشي المهم والحلو فيها تركبيتها خفيفة تعطيك زي السحنة الذهبيه والبرونز الخفيف جدا طبعا تثقلين مثل مانتي حابة
استخدامي لها :
بفرشاة كبيرة جدا وكمية قليلة واهف الفرشاة عشان مايجيك اللون قوي أو يبقع بمكان ومكان لا
حلوة نتيجتها بس ماقلت فيها شيمر كثير للي يفضل البرونز اللامع
أستخدمها اذا ماودي أكثر تان أو يوضح مرة ك تتش بسيط وخطوة أخيرة على الوجه وانتي مخلصة ميك أب
فيها عيب / انها تتناثر بشكل مملّ ويبهذلك + الشيمر فيها قوي ممكن تنفع لسهرات أكثر شي + ممكن تبين المسام اذا كثرتي
ويصير الشكل مزعج
سواتش لها -انا هنا مكثرة الكمية ع اساس يبان اللون - :
اللي بعدها روج من TOM FORD
اسم الدرجة : CASABLANCA 03
كريمي وثابت ولونه دافيء تقريبا موف على بينك غامق شوي
مكان الشراء : سوق الحرة -مطار دبي
السعر : 189
احب الروج هذا وأحس انه من اكثر الارواج الهاي إيند اللي توفقت فيها
يعطيك على موف أكثر شي وجميل جدا جدا مع الكات آي وشدو الاوف وايت او السلفر والفواتح بشكل عام
هذا سواتش له :
العناية بالبشرة والشعر :
زبدة العنبر من فيكتوريا سيكرت
هالزبدة ماحب ادخل المخل ولااشتريها ما أقاومها لسببين :
ريحتها تجنن اذا ودك تدلعين عمرك أو عندك مناسبة أشوفها حلوة وخيار مناسب لأي عروس ريحتها شي خفيييف وحلو
قوامها خفيف و ترطيبها حلو
يعني جامعة كل المميزات ومستحيل أستغني عنها مع اني جربت غيرها وحبيتها زي زبدة الخام والكاكاو بماركس سبنسر-
بس مميزة بسبب الرائحة الحلوة
اليسار :
ماسك جوز الهند من صيدلية بوتس ,
أكثر منتج حللته بريفيواتي $
دايم اشتريه لسبين : سعره 17 بس - حلاته بخفته يعني جربت ماسكات كثيرة بس احسها ثقيلة هذا لأ , خفيف قوامه خفيف دم يعني $
اللي بعده :
ببدأ من يمين :
صابونة الكركم - أهم شي تاخذينها من العطار أو الصيدلية -
هالصابونة مفروض حطيتها ببوست لحالها كأفضل صابونه ومنتج مثالي لمحاربة الحبوب الكبيرة الكبيرة بالوجه ؟
ماتتخيلون قد ايش أدعي لمن أشار علي بهالصابونة كنت في معاناة من الحبوب وشكل بشرتي لمدة نص سنة
استخدمت هذي شهرين فقط وين الحبوب ؟ مافيه خلاص
بس للأمانة ماتبعد الآثار علطول يعني تعالج الحبوب لان مكوناتها زيت اللوز والكركم وكلنا نعرف فوايدهم للبشرة
تطهر الحبوب تنشفها تخفف الزيوت المسببة لهذي الحبوب وشوي شوي تعالجها
الاثار تبغى وقت ومقشرات ثانيه بس لاتستعجلين عليها
فوائدها الثانية :
تقوي الجلد ,
نضارة
تفتيح
انتعاش
وريحتها حلوة وسعرها جميل 5 ريال بس
استخدامي لها : مرتين فاليوم اول ما أصحى ووقت النوم
اهم شغلة : اذا بشرتك جافة أو مختلطة لجافة أو حتى عاديه ضروري ضروري ترطبين بعدها بمرطب ثقيل لانها تنشف الوجه مثل : سيتافيل
اذا بشرتك دهنيه ماتلغين الترطيب بس اختاري مرطب يوازن لك الدهون بالبشرة مثل مرطب : بايو ديرما
2- مرطب سيتافيل لبشرة حساسة أو جافة
ما اقدر أتكلم عن هالمرطب لأنه فوق المدح وناسبني جدا وكل ماخلص ضروري اشتريه
- أهم شغلة عنه : طبي بدون ريحة خيار مثالي للبشرة
3- فرشاة التقشير للوجه من بدي شوب :
هالفرشاة ماحبيتها علطول لاني استخدمتها ووجهي فيه حبوب وحسيت أنها أضرتني فأبتعدي عنها اذا عندك حبوب
بعد ماخفت واختفت ولله الحمد رجعت استخدمها لشغلتين :
ازالة الميك أب - التقشير بحركات دائرية وخفيفة
وللأمانة ما أستخدمها كل يوم
حلوة وشعيراتها ناعمة عالوجه
4- فيتامين سمك القد او كبد الحوت :
استخدمته شهرين فادني من ناحية الاظافر صارت قوية جدا جدا وحسّن لي مظهرها بشكل عام طلعت يديني جميله واحبها حسيت بفرق
تأثيرها حلو بشكل عام على البشرة والشعر -تحسين وتلاحظينه مع الوقت -
شغلة سيئة جدا فيها ما ادري اذا صارت معي لحالي أو مع غيري :
أرق شديد وقلة نوم !!
أرق شديد وقلة نوم !!
سببت لي معاناة صراحة ً لدرجة أني آكلت معها بندول نايت *_*
اللي بعدها :
سيروم زيت الحية : له أنواع الحلو فيه مايدهن بالشعر كثير ويخرب عليك الدعوة , لأ خفيف أخف من السيروم اللي استخدمتها قبل زي -كرستال-
مزيل مناكير سيفورا :
مفروض نوحد الدعاء لمخترع هالمنتج أول أكره فقرة لي المناكير احيان أكنسلها بالطلة واعرف أنه مو حلو واحس بتانيب ضمير $
الحين ؟ خلاص ودعنا هالشعور
شي مهم لهالمنتج : حاولي ماتزيلين فيه مناكير أسود أو غامق
حسيته وصخ لي التعبئة
- مناكير درجته فوشي بس مو فاقع من H&M
حابته كثير هالفترة أحطه دايم
- كريم صبغة من كولستون :
لونه أشقر متوسط رمادي
اشقر فيه حواجبي
الميزة فيه :
لونه قريب من لون شعري ومناسب لبشرتي - يصبغ علطول يعني أغلب الالوان الرمادية ماتثبت بس هذا لأ , حلو ويثبت
-اللي بعده
BED HEAD TIGI Brunette Goddess Shampoo & Conditioner
الشامبو هذا من صيدلية بوتس :
موجود بالمفضلة الاخيرة تكلمت عنه :
اقتباس كلامي عنه
إنه مكون من لوز معطر , بروتينات , قمح , صويا و منعم للشعر
مغذي للشعر وينعم الشعر يعطي حماية للشعر من الاشعه فوق البنفسجية الضارة
ويساعد على حماية لون الشعر
رايي فيه :
شامبو مرطب للشعر قوامه خفيف ريحته كيك كوفي كراميل شي زي كذا
ريحته مرة شي حلو صايرى أكيّف عليها جدا $
مناسب للشعر الجاف لأن ترطيبه عالي , وينعم الشعر
أحيان ما أحس بحاجة للبلسم اذا استخدمت هالشامبو
لذلك بيكون خيار ممتاز للشعر الجاف
الاستخدام /
تتركينه من 3 _ 5 دقايق قبل الشطف ع اساس تعطين الشعر مدة ليترطب
انا كنت باخذ شامبو وبلسم من ماركة ثانيه ولاحصلته وحبيت أجرب هذا المنتج
مافيه مانع من التغيير والتجربة والاهم اإني كنت أدور على ترطيب لشعري
وهذا مناسب .
^
هذا جميل وينشرى مرة وثنتين وثلاث
- آخر شي في مفضلاتي :
العطر : برايفت كولكشن من استي لودر
مارح أوفيه حقه مهمها اتكلم شي جمييييل وريحته تجنن مادري عشاني أعشق الياسمين ؟
هذا افضل شي شميته بالياسمين
وبس
اذا فيه سؤال عندكم او فكرة بوست تحبون أني أحطها عن اي شي يخص الجسم والبشرة او الميك اب
انا حاضرة لكم بـ :
الاسك مي
الاسك مي
وسلامتكم كونوا بخير دايما
