Review : Boots Pharmacy

سلام ياجميلات 

هالبوست بتكلم عن صيدلية بوتس 

وش شريت منها وش الاشياء اللي جربتها 

من شامبو - بلسم - ماسك الشعر - الشاور جل الزبدات والسكرابات وغيرهم 

أول شي ببدأ فيه : 

هالمنتج  

BED HEAD TIGI Brunette Goddess Shampoo & Conditioner

اليمين بلسم والشامبو ماركة تيجي

تكلمت عنه بإنستقرامي

مكتوب بالموقع :

إنه مكون من لوز معطر , بروتينات , قمح , صويا و منعم للشعر 

مغذي للشعر وينعم الشعر يعطي حماية للشعر من الاشعه فوق البنفسجية الضارة

ويساعد على حماية لون الشعر 

رايي فيه :

شامبو مرطب للشعر قوامه خفيف ريحته كيك كوفي كراميل شي زي كذا 

ريحته مرة شي حلو صايرى أكيّف عليها جدا $

مناسب للشعر الجاف لأن ترطيبه عالي , وينعم الشعر

 أحيان ما أحس بحاجة للبلسم اذا استخدمت هالشامبو 

لذلك بيكون خيار ممتاز للشعر الجاف

الاستخدام /

 تتركينه من 3 _ 5 دقايق قبل الشطف ع اساس تعطين الشعر مدة ليترطب

انا كنت باخذ شامبو وبلسم من ماركة ثانيه ولاحصلته وحبيت أجرب هذا المنتج 

مافيه مانع من التغيير والتجربة والاهم اإني كنت أدور على ترطيب لشعري 

وهذا مناسب .

  SOAP & GLORY 

هالماركة العجيييبة اللي سوت بي سوايا $

كنت اقرى عنها واشوف البنات يطلبون كثير منها أون لاين بما انها كانت مو عندنا بالسعودية 

وجهزت لي لسته مثلي مثلهم بطلب أون لاين

وفهالاثناء فتحت لنا هالماركة بكل صيدليات بوتس < حمدلله وأخيرا 

وصرت أجرب في منتجاتها 

بديت بالسكرابزات 

 هذا شكله من جوى 

FLAKE AWAY سكراب 

مقشروللجسم وموجه للساقين وللقدمين والمرفقين بشكل خاص

مكوناته بالموقع :

مع زبدة الشيا، زيت اللوز الحلو، والخوخ مسحوق البذور، وملح البحر والسكر. 

تجربتي : 

حبيباته مرة ناعمة وخفيف وتميزه ريحته 

المقشرات الثانيه من هالماركة افضل نتيجة وتقشير منه 

تقييمي : 

7 / 10 

هالسبعه للريحة 

بإختصار ومن دون كثرة شرح ومكونات ومدري ايش :

هالمنتجين والماركة بشكل عام دعائية وللي ودها تدلع نفسها وتحب الروائح العطرية

يعني ماتعطيك نتايج مذهلة أعتقد فيه خيارات أفضل من منتجاتها بكثير

يعني ماشفت نتايج مرة ابهرتني بهالسكرابين كلهم تقييمي لهم متقارب ودون ال 60%

اليمين : حبيباته سكر ينظف فيه رغوة

مشكلته ينشف الجسم يبغاله ترطيب عميييييق بعد الاستخدام

تقييمي له 6 / 10

اليسار : حبيباته مهي بارزة مثل الاول

مافيه رغوة , ريحته كل الاثنين روائحهم جميلة بما اني اتكلم عن سوب آند غلوري بشكل عام -لازم نحط هالشي فبالنا-

يرطب الجسم بعكس الاول , وهذا الشي خلاني أحبه اكثر بما إن بشرة جسمي جافة

تقييمي :  7/ 10

الاول تنظيف بس ينشف , الثاني ترطيب بس مافيه تنظيف عميق مثل الاول

شفتوا قد ايش بخيلة بالتقييم ؟

لأن الماركة مو توب التوب , عادي بإستثناء روائحها واستكراتها وهالشي بحد ذاته وسيلة جذب عاااالية للمنتج !

الشاور جل بالنص

نفس الشي عطري وتميزه ريحته بس 

مافيه أي ميزة ثانيه بالعكس حسيته له سلبيات : يجفف الجسم 

Moisturising Scrub with Grapeseed oil

يمين فوق سكراب مقشر للجسم

تكلمت عنه بالبوست السابق

الحبيبات اللي فيه عبارة عن ملح - قوامه ثقيل شوي بس مناسب جدا لجفاف الجسم وفيه نسبة ترطيب عااااااااالية

حجمه كبير و بشكل عام TOP 

المهم فيه انه أفضل من سكرابات سوب غلوري كتقشير عمييق وترطيب وبرضو ريحته حلوة بس اكيد مو احلى من سوب غلوري :P

بس كجودة اعتبره الافضل بفضل الحبيبيات الكبيرة اللي فيه + التنظيف والتقشير العميق + الترطيب العميق + الريحة الهادية

جامع كل المميزات اللي أدور عليها

-

اللي بعده ماسك الشعر بجوز الهند - تكلمت عنه

ريحته أول شي حلوة - من افضل الماسكات اللي جربتها ممتاز  - ممكن أرجع اشتريه - بالقائمة يعني -

يميزه سعره : 17 منخفض وجودته ممتازة 

شامبو وبلسم جوز الهند :

خذتهم من المدح اللي قريته عنه

مكتوب انها للشعر الجاف و شعري جاف , بس صارت تجفف الشعر اصلا

لذلك اشوف ممكن تناسب الشعر الدهني ,

استخدمته أختي وشعرها فروته دهنية برضو نشف شعرها وماحبته أبد

والبلسم اصلا كأنه مويه يعني أتوقع بيناسب اللي ماتحب البلسم الخفيف او اللي مايرطب ويدهن مرة

صراحة خيب لي آمالي هالشامبو ومستحيل ارجع اشتريه مرة ثانيه

زبدة الشيا وزبدة الكاكاو

خذتهم بوقت ماكان عليهم عرض

الشيا جميلة وترطيبها جميل وخفيفة ريحتها

والكاكاو برضو نفس الشي

بس تعيبه الريحة مو جميلة ابدا : ريحة خميرة وشي مكتوم مرة

أنا استخدمتهم بفترة برودة الجو وصراحه مدري كيف بتطلع النتيجه لو عرقتي ومع الحر وكذا شي ماينضمن

مع العلم أني استخدم زبادات ماركس سبنسر ولي تجربة مع زبدة بدي شوب حقت الكاكاو واشوف روائحهم أخف من هذي بكثير

وطبعا أفضل شي بينهم ماركس سبنسر -زبدة الكاكاو-

هالشي سكراب كان عليه عرض هو لوحدة هالريحة والباقي بسعرها الاصلي

خذته منه عدد انا وخواتي الحلوين

ريحته فكس نعناع شي زي كذا المهم انها ريحة قوية وتاكلك بالبرد وقت الشاور

وهالشي حبيته فيه انتعاش واسترخااااء

الحبيبات اللي فيه مرة خفيفة يعني بسرعه تتلاشى وانتي توزعينه

تفاوت تقييماتهم له وحده تقول جميل والثانيه تقول سيئ !

وتجربتي له :

اشوف انه عادي حل لابأس به لأني اقدر اي شي يرطب الجسم وهذا سوى لي تقشير وترطيب - بشكل متوازن -

بس طبعا التوب بينهم

 Moisturising Scrub 

تقييمي :

5 /10

عشان البرودة واحساس الانتعاش الحلو $

مناديل لأزالة الميك أب

خذت بدون ريحة لأن مشالله بشرتي صايرة حساسة وتحبب من اي شي

مو حلوة هالمناديل ماتنظف علطول + تحسس وجهي منها مع اني ماخذه بدون ريحه

بس طلعت لي حبوب وتركتها

هو اساسا عندي حبوب من قبلها بس هذي زودت المووضوع بعد ماستخدمتها لاحظت

شاور جل باللافندر والياسمين <ياسلااام كملت

الروائح اللفندرية عشقي الابدي أدورها بكل شي حتى بالمطهرات حقت ارضية البيت

روائح الافندر بشكل عام تساعد ع الاسترخاء

رغوته حلوة وكثيييفة + ينظف بدون تنشيف وجفاف قوي

وهالشاور جل جامعلي الروايح اللي أعشقها فأعتبره توب ودك آكله وقت الشاور  :P