Highlight & Contour

أهلين كيف الجميلات , زمان عن المدونة

هالبوست ان شاءالله بتكلم عن تجاربي الشخصية ف الإضاءة و الكونتور

طبعا أغلبنا تعرف وش الهايلات والكونتور :

الاول : نستخدمه عشان نبرز ملامح الوجه

الثاني : العكس عشان نخفي أو نحدد ملامح الوجه ونعطيه الشكل المناسب

أي ميك أب بدون وجود هايلايت أو كونتور مايجمل مع الاسف حتى لو كان ميك أب لطلعة عادية

مو شرط أستخدم هالشيئين اذا بثقل الميك أب

طيب خلوني أول شي أتكلم عن منتجاتي اللي استخدمتها لهالغرض و بالتفصيل  :

ببدأ ب MAC :

الاولى : : Soft and Gentle Mineralize

 إضاءة أو هايلايت اسمها سوفت آند جنتل

طبعا الاضاءة باودر معدنيه من عائلة المنيرلايز اللي تركبيتها خفيفة وفيها مواد 

معالجة للبشرة ومضاده للأكسده ومصنعه بشكل خاص

لها درجات كثيرررررة بماك والاختيار طبعا حسب الدرجة القريبة من بشرتك

الاضاءة هذي خذتها ليه ؟

 لأن تركبيتها خفيفة ولونها خفيف ناااعم-

تنحط على عظمة الخد - فوق البلشر - وعالانف والشفة العلوية ( تتش بسيط )

سواتش لها : 

 رايي الشخصي لها : 

أمانة / قبل اشتريها كنت أحس أني بحتاجها كثير , لما اشتريتها ماتحمست لها ليش ؟ 

مو لأني تحسفت لأ ماوصلت لهالدرجة معها بس حسيت أن وجودها مو مهم كثير كبودرة وخاصة أن عندي اضاءات كريمية أفضلها 

وانا أحب الكريمي بالميك اب أكثر من الاشياء الباودر 

فصرت استخدم الاضاءة الكريمية بعدين اثبتها بشوية شووووية من هذي كمية بسيطة يعني حولين عظمة الخد وفوق البلشر - للسهرات-

فهي حلوة بس ما تكثرين منها راح تبين مسامك , وحاسة أنها بتطول عندي واذا خلصت مرح اشتريها ثاني 

الهايلايت الثاني من MAC  :

كلر بيس - درجتها بيرل -

 إضاءة كريمية تنحط بأماكن الاضاءة بالوجه فوق عظمة الخد + فوق الشفة العلوية + الانف + بوسط الجبين + مدمع العين

مميزاتها :

لو هذاك اليوم حسيتي وجهك باهت ودك يبين مشرق  أكثر وفيه صحة ونضارة 

أنصحك فيه بقوة تنحط باليد طبطبه - تدمجينها شوي بفرشة الفاونديشن ع اساس

 تندمج ولاتبين مو مرتبه ممتازة جدا ما اقدر استغني عنها

سواتش لها : 

الهايلايت الاخير من MAC : 

قلم هايلايت إضاءة سائله على شكل عصار لونها جاي أصفر وفيها لونين ثانيه بس 

هذا اللي يناسب بشرتي طبعا هو نفس وظيفة السوفت آند جنتل -الاضاءة اللي فوق-

هذا جدا جميل وتقريبا استبدل البيرل به , ويستخدم اكثر شي ك اضاءة فوق الكونسيلر نفسه اذا انتي تحبين هالمنطقة منوّرة مثل كيم كارديشيان 

* طيب قبل اجي للهايلايت الباقية بقولكم شي : 

الحين عندي كل انواع الاضاءة العصار والبودرة والكريمية ممكن تقولون ليش كل هذا ؟

كل واحد وله لوك معين يعني السوفت جنتل استخدمها اكثر شي لما اكون حاطه اساس برونز لأن الدرجة قريبة من البرونز 

برضو مو شرط استخدمها بنفس الاماكن مثل ماقلت البيرل استخدمه احيان ك بيس لللشدو

أفضل شي فيهم أو وش اللي أحس انه مهم-مع انها مهمه كلها بالنسبة لي - ولو 

يخلص بشتريه ؟

الكلر بيس

وطبعا كلها على حسب اللي تحبينه انتي او اللي ترتاحين له ويناسبك ميولك بالهايلايت :

 اذا تحبين السايل مرة او البودرة اذا بشرتك دهنية يعني 

وكلها جميلات 

نكمل $

-

هايلايتر من ماركة  N7

منه درجتين جاي على شكل عصار

كنت متحمسة له قبل أشتريه , بس ماحسيت أنه مناسب للفيس لانه يبين المسام نوعاً ما

صرت استخدمه للجسم بالسهرات ويعطيني نتيجة حلوة

مثل ماتشوفون سايلة و تندمج  بسرعة عالبشرة وبرأيي الشخصي ماتنفع للفيس 

لأن فيها بادئل أخف وأحلى منها 

- 

اللي بعدها إضاءة من فور إيفر - اسمها ستار باودر ومعها برضو اليسار -دايموند- من نفس الماركة وكلهم هايلات 

لازم تعرفون أن هالثنتين أوفر شوي بما إنها بودرة يعني تنفع لسهرات أكثر وجايه على ذهبي مو نفس الصورة

الكمية تاخذين قليل واستخداماتها متعددة تحت الحواجب أو ك آيشدو لأنها قلتر أكثر من أنها مجرد اضاءة وخصوصا اللي عاليسار

هالثنتين احسها ضرورية كثير بالنسبة لي فالمناسبات والاعراس فقط , يعني مستحيل تخدمك بطلة عادية رح تبين أوفر زي ماقلت

نجي للكونتور اللي استخدمهم  : 

اول شي الكونتور او البرونز الاثنين من بنفت : 

اليمين : بودرة برونزية درجته فاتحة شوي بس مناسب لبشرتي وجميل لتحديد الوجه -طبعا الفش حقته مات - وهذا اهم شي بمسألة الكونتور 

الثانية : كريمية وجميلة للنحت بشكل أحترافي يعني لو مااندمجت كويس مرح يبين جميل لأن قوامها كريمي جدا 

وشخصيا أفضلها على الاضاءة اللي قبل 

الكونتور من MAC :

جميل جميل جدا مثل ماتشوفون متحفر $ 

فيه شوي شيمر غير عن البرونز الباقية بس مو أوفر الشيمر اللي فيه مقبول 

الكونتور من برجوا : 

هذا البروداكت الفنش تبعه جميل جدا وحبيته بس عيبه ماينحك بالراحة 

وممكن تكرهينه , افكر ادقه وبحطه بعلبة ثانية لأنه طفشني كثير وصرت أرميه بالدرج 

آخر كونتور بهالبوست : 

الدرجة الخامسة من باليت نيكد 1 : 
BUCK 

هالدرجة جميلة لتحديد الانف وبرضو لتحديد كسرة العين نفسها 
اللون حلو يعطي كونتور طبيعي 
شخصيا استخدمه لتحديد الوجه ككل مع فرشاة صغيرة ودقيقة 

اهم شي فالكونتور :

- يكون على بني رمادي مايكون جايك على أورانج 
ع اساس يعطيك شكل طبيعي البرونز الاورانج براي طلة مزعجة جدا وغلط ×

- يحتاج دقة ودمج صح عشان لايطلع مبقع أو أوفر 

- ضروري تعرفين النحت المناسب لوجهك 

..

هذي شوية صور لكونتور وهايلاتر  برايي أنه بيرفكت جدا ومناسبة لشكل الوجه : 

فيديوز برضو أحس الشغل فيه جدا بيرفكت  : 

 وصلوا عن الدقيقة 12

وبس <$

- اسماء البرونز والمنتجات بدرجاتها كلها واضحة -

- أي أسئلة حابين اسئلوني بالآسك : 

http://ask.fm/adDax